Lais Manekat

 

A-nbi lulut ahunut i, au una’at au nekak ma au nekseunbanit neo Ama Afe hinat henait au u'bei' tui an lais fuaf i. A-nbi tui meto un-unu i, au he eut ma uton kit neu lais fuaf es a-ntom bin hit monik neno-neno.

 Le lais fuaf nane nak: Lais Manekat.  Lais manekat nane n-tui nani es Sulat Knino in nanan, Usi Yesus in Ukan Ahunut ma Anaet esle nak Lais Manekat neu Uisneno ma Lais manekat neo hit aok biak.

 Nbi Sulat Knino in nanan hitat nen, Usi Yesus nanoina kit het manek es nok es. "Manek ho Uisneno, mek ho nekam ok oke, ma mek ho smanam ok-oke, ma mek ho matanim ok-oke, ma mek ho loelme ok-ok ma manek ho aom biam onle ho aome kum" (Luk 10:27). Lasi knino i teket nak Ukan Ahunut ma anaet. Hit Usi Yesus mpa ma nanoena kita he tmanek es nok es bin hit monik.

Lais Manekat: Lalan Uisneno

A-nbi Klei Katolik in nanan hit manoe tnen le lais fuaf “Lais manekat”. Mes nbin hit monik, lais manekat i ka manao fa. Hit sumak he mamus ma matoe. Lais manekat i, in nesan nana namolok neu kit het manek es nok es onle hit Usi manek nalail kite.

Lais manekat i in naik nako le huma-huma. Hit ala het manek tok le tuaf hit tahine mes le tuaf bute hit kat manekef. A-nbi le tuis i, au he etum uton kit neu le lais manekat nbin hit monik neno-neno. Le lasi i teket tak lais Uisneno.

Lais Manekat Ka Namnesfa Nok Lais Malomet ma Lais Mamnaut

A-nbi Uab meto in nanan, hita tmui bata le manekat. Kalu nbi Bahasa Indonesia in nanan, hit tahina ha “Cinta” nmes.  Mes nbi Uab meto in nanan, in namnes nok Uab Yunani. Eros, Filial ma Agape.

Eros i, kalu tek metot nak Lais Malomet. Hitat maloem ma ma sinmakan afun hit tail in human, in nakan, in pi oten ma in masan. Kalu ka namas hit kat lom jef. Nanen nakam eros ai lais malomet.

Filial i, kalu tek metot nak Lais mamnaut. Hit tamnau tuaf afun in esan pein kit ma ntulun kit nek loet a mnahat. Kalu in kan ntulun kit ma npein kit, hit ka tamnaube fa. Mes natui in an pein kit a hit tam naube.

Agape i, tek metot nak Lais Manekat. Hit Usi Yesus in je esle i. In anmaet nbi hau nehe he nasoi kit nako sanat pah pinan. In kan soe fa hit i sekau mes in manekan naek neu kit In an fe In aoen he nkus e neu hau nehe (klus).

Aina ama oli tata sin au usine kit he tanaob lais manekat  nbin hit monik neno-neno. Kaisat tatoan tuaf bian. Kaisat nek menan tuaf bian. Kaisat sinmakan tuaf bian ini. Manekaha hite onle Usi Yesus in manekan neu kit.

Matani, Kupang 25 Oktober 2021✍